Ballad O' Holyrood

It stertit wi a’ guid intent
Tae build a Scottish parliament
Whaur MSPs could a’ gie vent
Tae oor concerns
An cause the odd richt stoor anent
Jock Tamson’s bairns

But wha could mak a place sae braw
Wha widny dither, hum or haw
Could sic a chiel be fun’ at a’
At this late ‘oor
Step furrit noo, the nation’s pa’
Big Donald Dewar

Big Donald got yon chiel Miralles
Tae draw a Zanadu-lik palace
tho’ it turned oot a bit poisoned chalice
For Scottish folk
Wha, gin they think thirsells richt gallus
Thocht it a joke!

But Don an’ Enric c’ad the shots
Tied a’ the oppo up in knots
Sayin’, pick ony site ye like, there's lots
That fit the bill,
Foreby yon shibboleth o’ the Scots
On Calton Hill

The Tories said it made nae sense
The Libdems sat upon the fence
The Nats blew hot and cold and thence
They took the huff
Big Margo coontit up the pence
And said “Enough!”

Noo, wha’d a thocht some upturned boats
Wid cost near hauf a billion notes
That’s quite a lot a porridge oats
Fur oor wee clan
An’ nixt time that the nation votes
Wha’ll haud the can?

Bit noo its done, we’ve had the pain
We’ll learn to love it lik a wean
This child o’ Scotland and o’ Spain
Is aff the ropes
It kerries thru sun, snaw and rain
Oor nation’s hopes